Uganda yakiri kulisaidia jeshi la Sudan Kusini vitani

Jeshi  la  Uganda  limesema  kuwa  majeshi  yake yamejiunga  na  jeshi  la  serikali  ya  Sudan  kusini  katika vita  dhidi  ya  uasi  kwenye taifa  hilo  changa  duniani.
Msemaji  wa  jeshi  la  Uganda  luteni  kanali Paddy Ankunda  amesema  leo kuwa  majeshi  ya  uganda yanasaidiana na vikosi vya serikali ya Juba  kuwaondoa waasi  katika  mji  wa  Bor, mji  muhimu  karibu  na  mji mkuu juba ambao  umeshuhudia  mapigano  makali  tangu kuanza  kwa  mzozo  huo  katikati  ya  mwezi  uliopita nchini  Sudan  kusini. 
Maafisa  wa  Uganda  wamekuwa wakikana   kuwa  majeshi  ya  nchi  hiyo  yamejiunga  na mapigano, wakisema  majeshi  ya  Uganda  wamewekwa Sudan  kusini  kwa  ajili  ya  kufanikisha  zoezi  la kuwaondoa  raia.
Rais Yoweri  Museveni  wa  Uganda  amesema  jana  kuwa wanajeshi  wa  Uganda  wameuwawa  katika  mapigano nchini  Sudan  kusini. 
Akizungumza  katika  mkutano  mjini Angola  jana, Museveni  amesema  majeshi  ya  nchi  yake yamekuwa  yakipigana  kulisaidia  jeshi  la  serikali nchini Sudan  kusini.
Nao  wabunge  wa  Marekani  wameeleza  kufadhaishwa kwao  jana kuhusiana  na  wimbi  la  ghasia   nchini  Sudan kusini ,na kuwekea alama ya kuuliza hatua ya  marekani kuendelea  kutuma  mamilioni  ya  dola  kuisaidia  nchi hiyo.
na DW.DESwahili

Share this

Share on FacebookPlus on Google+