Showing posts with label July 30. Show all posts
Showing posts with label July 30. Show all posts
SERIKALI YATOA SABABU YA KUWAKAMATA WAFANYAKAZI WA ACACIA

SERIKALI YATOA SABABU YA KUWAKAMATA WAFANYAKAZI WA ACACIA

Idara ya Uhamiaji imesema jukumu la Udhibiti wa Uingiaji na Utokaji wa raia wa kigeni nchini, linatekelezwa kwa mujibu wa Sheria ya Uhamiaji Sura ya 54 (Rejeo la 2016) na wala haiwalengi wafanyakazi wa Kampuni ya Madini ya Acacia peke yake.
Ni hitajio la kisheria kwa kila raia wa kigeni anayeingia na kutoka nchini kukaguliwa ili kujiridhisha iwapo hakuna dosari zozote za Uhamiaji, Ulinzi na Usalama.
Sheria ya Uhamiaji inaitaka Idara ya Uhamiaji kumhoji mtu yeyote awe raia wa Tanzania au kigeni bila kujali anafanya kazi kwenye Kampuni au Shirika gani, pale inapotaka kujiridhisha juu ya uhalali wa ukaazi wake hapa nchini na ikijiridhisha kuwa mtu huyu hana dosari zozote inamwachia huru kama ilivyofanyika kwa wafanyakazi wa Kampuni ya Madini ya Acacia waliohojiwa na kuruhusiwa kuendelea na safari yao hivi karibuni.
Idara ya Uhamiaji inapenda kuuarifu Umma kuwa hakuna sababu zozote nje ya matakwa ya Sheria ya Uhamiaji zinazopelekea Idara ya Uhamiaji kuweka kizuizi cha kuja au kutoka kwa wafanyakazi wa kigeni wa Acacia.
Tunapenda kuujulisha Umma kuwa ni muhimu kwa watanzania na raia wa kigeni wanaokusudia kuingia na kutoka nchini kuhakikisha wanafuata Sheria za Uhamiaji ili kutimiza hitajio la kisheria.
Imetolewa na
Ally M. Mtanda
Msemaji wa Idara ya Uhamiaji
29 Julai 2017

from Blogger http://ift.tt/2uK0nVV
via IFTTT


MAPINDUZI YA DATA KUONGOZWA NA VODACOM

MAPINDUZI YA DATA KUONGOZWA NA VODACOM

MKURUGENZI Mtendaji wa kampuni ya simu za mkononi ya Vodacom Tanzania, Ian Ferrao, amesema kampuni yake imejipanga katika kuwa kinara wa teknolojia ya data hapa nchini ili kuongeza idadi ya watumiaji wa mtandao huo.
Akizungumza jijini Dar es Salaam hivi karibuni, Ferrao alisema katika miaka ya karibuni, idadi ya watumiaji wa data imeongezeka hapa nchini na Vodacom imejipanga vilivyo kutumia fursa hiyo.
“Katika miaka ya karibuni, Watanzania wengi zaidi wameanza kutumia vifaa kama vile simu na kompyuta kwa ajili ya kutafuta taarifa taarifa na maarifa mbalimbali yanayopatikana kupitia mitandaoni. Kwa sasa Vodacom inaona kuna fursa kubwa ya ukuaji katika eneo hili,” alisema bosi huyo wa Vodacom Tanzania.
Akieleza kuhusu hali ilivyo ya ukuaji wa watumiaji wa data, yaani matumizi ya internet kupitia simu za mkononi na kompyuta, Ferrao alisema katka kipindi cha miaka miwili tu, 2014/2016, idadi ya watumiaji wa data kupitia Vodacom imeongezeka kutoka watumiaji milioni 3.8 hadi watumiaji milioni 5.4; wote wakiwa watumiaji wa kudumu.
Akizungumza kwa kutumia takwimu, Ferrao alisema katika kipindi hicho kifupi, matumizi ya data yameongezeka kutoka asilimia 37 ya watumiaji wa simu hadi asilimia 44 kufikia mwaka jana.
Taarifa rasmi za Vodacom Tanzania zinaonyesha kwamba ongezeko kubwa zaidi la matumizi ya data liliongezeka katika kipindi cha mwaka 2014 na 2015 ambako ilitoka asilimia 37 hadi 43 ndani ya mwaka mmoja tu.
Ferrao alisema katika kujipanga kuongeza idadi ya watumiaji wa data, Vodacom Tanzania itaweka mambo mbalimbali yakiwamo bei rafiki kwa wateja na kuwa na kasi nzuri zaidi kuliko washindani wake.
“ Kuna njia kuu nne ambazo Vodacom Tanzania itazitumia katika kuhakikisha kwamba tunabaki kuwa vinara katika eneo la kutoa huduma bora na za kisasa kwa wateja wetu.
“ Kwanza ni wazi kwamba tutawekeza katika miundombinu yetu ili iendane na mahitaji ya watumiaji wa data waliopo Tanzania. Tutahakikisha watumiaji wa Vodacom wanapata data kwa spidi ya kuridhisha, kuwa na bei nafuu kwa wateja ndiyo mtandao wenye spidi nzuri ya internet kuliko mingine na pia kuweka sababu zitakazowafanya watu watake kutumia data zaidi,” alisema Ferrao.
Katika miaka ya mwanzoni ya matumizi ya simu hapa nchini, kampuni nyingi, ikiwamo Vodacom ilikuwa ikipata fedha nyingi kupitia watu kupiga simu kwa wingi na kutumiana ujumbe mfupi wa maneno (SMS).
Hata hivyo, tangu kuanza kwa matumizi ya data kwenye simu, takwimu zinaonyesha kwamba duniani kote, si Tanzania pekee, matumizi ya data yameanza kuwa makubwa zaidi kuliko hata watu kupiga simu na SMS kama ilivyokuwa zamani.
Tanzania ina fursa kubwa ya ukuaji wa matumizi ya data kwani uchumi wake umekua ukikua kwa wastani wa asilimia saba katika kipindi cha miaka kumi iliyopita huku ongezeko la watu pia likiwa la kuridhisha.
Tangu Vodacom imeingia hapa nchini mwaka 2000, imekuwa na kawaida ya kuwa ya kwanza kubuni vitu ambavyo baadaye vimekuwa vikiigwa na wengine.
Vodacom Tanzania ni kampuni tanzu ya kundi la kampuni za Vodacom lenye makazi yake nchini Afrika Kusini. Kampuni hiyo ya Afrika Kusini nayo ni sehemu ya kundi la kampuni za Vodafone lenye makao yake makuu nchini Uingereza.
Mwisho

from Blogger http://ift.tt/2u9Lusp
via IFTTT


BARAZA LA MADIWANI WA HALMASHAURI YA WILAYA YA KYELALAVUNJWA NA SERIKALI

BARAZA LA MADIWANI WA HALMASHAURI YA WILAYA YA KYELALAVUNJWA NA SERIKALI

WAZIRI MKUU Kassim Majaliwa amewapa siku mbili Madiwani wa Halmashauri ya Wilaya ya Kyela Mkoani Mbeya kumaliza tofauti zao zinazokwamisha utendaji wa Halmashauri hiyo na kuendelea kufanya kazi walizotumwa na wananchi.
Tofauti hizo ambazo zimedumu kwa takriban mwaka mmoja zmesababisha Madiwani hao kushindwa kufanya vikao jambo linalokwamisha shughuli za maendeleo ya wananchi katika Halmashauri hiyo.
Waziri Mkuu ametoa agizo hilo leo (Jumamosi, Julai 29, 2017) wakati akizungumza na watumishi wa Halmashauri ya Wilaya ya Kyela akiwa katika ziara yake ya kikazi Mkoani Mbeya.
Amesema ikifika Jumatatu (Julai, 31, 2017) Madiwani hao wawe wamemaliza tofauti zao na wawaite wakuu wa Idara na kuwapa taarifa hiyo ili shughuli za maendeleo ziendelee kutekelezwa ndani ya Halmashauri hiyo.
“Baraza la Madiwani limegawanyika mnamgogoro tunataka uishe na mshirikiane na mshikamane katika kufanya shughuli za maendeleo ili wananchi waweze kupata manufaa. Mkiendeleza migongano hatutawavumilia Serikali inauwezo wa tutalivunja baraza.” 
Amesema baadhi ya Madiwani hao wanawatetea watumishi waliosimamishwa kazi kwa tuhuma za kuiibia Serikali mabilioni ya fedha jambo ambalo halikubaliki na halivumiliki. “Naombeni mmalize tofauti zenu mara moja kabla sijaondoka.”
Hata hivyo, Waziri Mkuu ameiagiza Taasisi ya Kupambana na Kuzuia Rushwa (TAKUKURU) mkoa wa Mbeya kuhakikisha watumishi wote waliohusika katika kula fedha za umma wanachukuliwa hatua kama alivyopendekeza Mkaguzi na Mdhibiti wa Hesabu za Serikali(CAG).
Pia aliwahasa watumishi wa umma kuhakikisha wanatimiza wajibu na majukumu yao kikamilifu kwa kufanya kazi kwa bidi na kuacha ubabaishaji na kufanya kazi kwa mazoea na badala yake wawahudumie wananchi ipasavyo.
IMETOLEWA NA:
OFISI YA WAZIRI MKUU,
JUMAMOSI, JULAI 29, 2017

from Blogger http://ift.tt/2tO0xsN
via IFTTT


METHOD MWANJALE ACHAGULIWA KUWA NAHODHA WA KLABU YA SIMBA

METHOD MWANJALE ACHAGULIWA KUWA NAHODHA WA KLABU YA SIMBA

Benchi la ufundi la klabu ya Simba chini ya kocha wake mkuu Joseph Omog limefanya marekebisho kwenye eneo la unahodha wa timu.
Katika marekebisho hayo yaliyoridhiwa na uongozi wa klabu, beki wa kimataifa Mzimbabwe Method Mwanjale ameteuliwa kuwa nahodha mpya wa timu ya Simba akichukua nafasi ya Jonas Mkude atakaendelea kuwa mchezaji mwandamizi kwenye kikosi hicho ambacho kwa sasa kipo nchini Afrika kusini kujiandaa na msimu mpya unaotarajiwa kuanza mwezi ujao.
Kwenye mabadiliko hayo ya kawaida, benchi la ufundi pia limewateua Mchezaji bora wa ligi kuu ya Tanzania na klabu ya Simba kwa msimu huu, Mohammed Hussein (Tshabalala) na John Raphael Boko kuwa manahodha wasaidizi wa timu hiyo.
Klabu inamshukuru sana Nahodha wake kwenye msimu uliopita na mchezaji wake mwandamizi, Jonas Mkude kwa kazi nzuri alioifanya muda wote alipokuwa Nahodha wa Timu.
Kwa sasa kikosi chetu kinaendelea na mazoezi na kila kitu kinakwenda vema huko kambini Eden
Vale Johannesburg nchini Afrika kusini.
IMETOLEWA NA..
HAJI S MANARA
MKUU WA HABARI WA SIMBA SC
SIMBA NGUVU MOJA

from Blogger http://ift.tt/2vbwyhQ
via IFTTT


GEITA ;RC AMZUIA WAZIRI KUZINDUA FILAMU YENYE MAADILI YASIOFAA

GEITA ;RC AMZUIA WAZIRI KUZINDUA FILAMU YENYE MAADILI YASIOFAA

Uzinduzi wa Filamu ya Magwangala ambayo imechezwa na wasanii wa Mkoani Geita pamoja na viongozi wa Halmashauri ya Mji ulikuwa ufanyike siku jana (Julai 27) umekwama kutokana na kuwepo kwa madai ya Mgodi wa Dhahabu wa Geita (GGM) kulalamika kuwa filamu hiyo inaonekana kuwa na mahudhui ya uchochezi baina ya wananchi na mgodi Mkoani humo.
Uzinduzi huo ulitarajia kufanywa na Naibu Waziri wa Habari, Utamaduni, Sanaa na Michezo, Anastazia Wambura katika ukumbi wa Desire Park .
Akizungumza juu ya hatua ya kukwama kwa uzinduzi huo Naibu Waziri Wambura, amesema kuwa kilichotokea alipatiwa taarifa kwa Mkuu wa Mkoa kwamba kuna picha ambayo sio nzuri na kwamba wao kama mgodi walilalamika juu ya picha hiyo na kwamba wameangalia na kuona kuwa kuna maeneo ambayo yamerekodiwa sio mazuri na tatizo ni mawasiliano baina ya Afisa utamaduni na Mkoa.
Kwa upande wake Mwenyekiti wa chama cha wasanii Mkoani Humo ambaye pia ni moja kati ya wachezaji wa Filamu Hiyo Bi, Rosemery Michael, amesema kuwa wao hawakuona mapungufu yoyote kwa maigizo ambayo wameigiza kwenye filamu hiyo ni uhalisia wa maisha ambayo yapo ndani ya Mkoa husika.
Baadhi ya wasanii na wananchi ambao wameudhuria siku ya jana kwenye uzinduzi wa Filamu Hiyo, Sagari Mganga na Neema Philipo wamesema kuwa hata wao wameshindwa kujua ni maswahibu gani ambayo yamejitokeza ambayo yamesababishwa filamu hiyo kutokuzinduliwa.
Manase Ndoroma ni meneja mwandamizi wa mgodi ambaye anashughulika na maswala ya jamii, ndani ya Mgodi wa Dhahabu wa Geita (GGM) amefafanua kuwa wao hawana ugomvi na sanaa wala na wasanii ila kumetokea shida ambayo wametoa kwa jamii kwa makusudi na kwamba mgodi huo una athari kwa jamii ambayo inauzunguka.

from Blogger http://ift.tt/2u91YBo
via IFTTT


CHADEMA KUMSHIKISHA ADABU ALIYEMFUKUZA MWANDISHI WA TBC KWENYE MKUTANO WA LISSU

CHADEMA KUMSHIKISHA ADABU ALIYEMFUKUZA MWANDISHI WA TBC KWENYE MKUTANO WA LISSU

Chama cha Demokrasia na Maendeleo (CHADEMA), kimesema kuwa, kimepokea kupitia vyombo vya habari taarifa za tukio la mwandishi wa habari wa TBC kushindwa kutimiza wajibu wake katika ofisi za Makao Makuu yake zilizopo Kinondoni, jijini Dar es Salaam.
CHADEMA imesemema, tukio hilo halikufanywa kwa maelekezo ya kiongozi yeyote na kama chama, hawajawahi na hawana sera wala msimamo wa kubagua chombo chochote cha habari.
Kwa mujibu wa taarifa iliyotolewa na Mkurugenzi wa Itifaki, Mawasiliano na Mambo ya Nje wa CHADEMA, John Mrema wamesema kwamba, katika hatua za awali wanafanyia uchunguzi tukio hilo ili kuweza kubainisha nini hasa kilitokea katika siku hiyo na wanategemea kupata ushirikiano kutoka kwa mwandishi husika katika uchunguzi wao.
Aidha, taarifa hiyo kutoka CHADEMA aliwahakikishia waandishi wote wa habari kuwa wataendelea kuwa salama katika matukio yote ambayo yatakuwa yakifanywa na chama hicho na watapata ushirikiano unaostahili.
“Baada ya uchunguzi wetu kukamilika tutatoa taarifa kamili juu ya tutakachokuwa tumebaini na hatua tutakazochukua. Sisi tunaamini katika uhuru wa vyombo vya habari, uhuru wa waandishi wa habari na haki ya kupata na kutoa habari/taarifa kuwa ni nguzo kuu katika kujenga taifa la kidemokrasia na hatimaye kufikia maendeleo ya kweli.”
Katika kudhihirisha kwa vitendo kuwa wanathamini uhuru wa habari na uwajibikaji, Mrema alisema, CHADEMA ni taasisi ya kwanza ya kisiasa iliyotia saini na kukubaliana na Azimio la Dar es Salaam Juu ya Uhuru wa Uhariri na Uwajibikaji, na kwamba hawana uhakika kama kuna taasisi nyingine ya kisiasa iliyofanya hivyo.
“Tunapenda kutumia fursa hii kuwahakikishia wadau wote wa habari, wakiwemo waandishi, wahariri na wananchi, kuwa tutaendelea kuionesha imani hiyo kwa vitendo katika shughuli zetu zote za kisiasa,” alisema Mrema.

from Blogger http://ift.tt/2viviKO
via IFTTT


Kategori

Kategori