Showing posts with label bongo news. Show all posts
Showing posts with label bongo news. Show all posts
WAKANDARASI WATAKIWA KUHAKIKISHA UJENZI WA UMEME UNAKAMILIKA KWA WAKATI

WAKANDARASI WATAKIWA KUHAKIKISHA UJENZI WA UMEME UNAKAMILIKA KWA WAKATI

WAKANDARASI wa ujenzi wa umeme kutoka Makambako hadi Songea wametakiwa na serikali kukamilisha mapema ujenzi huo ili kuondoa tatizo la kukatika mara kwa mara kwa umeme wilaya za mkoa wa Ruvuma.
            
Umeme huo unatarajiwa kufikia vijiji 120 vya mkoa wa Ruvuma chini ya mradi wa REA awamu ya tatu ambapo lengo la serikali ni kufikia wananchi wote mwaka 2025.


Akizungumza na wakandarasi wa mradi wa umeme wa REA kutoka Makambako Mpaka songea Naibu waziri wa nishati na madini Medard Kalemani amesema kuwa serikali inataka umeme huo kufikia Septemba mradi uwe umekamilika.


Akitoa taarifa ya utekelezaji wa mrati mbele ya naibu waziri Meneja wa mradi Mhandisi. Didas Lyamuya amesema kuwa utekelezaji wa mradi umekuwa ukikumbana na changamoto mbalimbali ikiwepo kucheleweshwa kwa fedha kutoka serikali kuu.



Mradi huo sehemu ya kwanza ni ujenzi wa njia ya umeme kwa kilomita 250 kutoka Makambako mpaka Songea kwa msongo wa kilovoti 220  upanuzi wa kituo cha Makambako kilovoti 220 na ujenzi wa kituo kipya Madaba na Songea kwa kilovoti 220 ili kuwezesha usambazaji wa umeme.
Mawaziri wafungua machinjio ya Vingunguti

Mawaziri wafungua machinjio ya Vingunguti

Mawaziri wafungua machinjio ya Vingunguti

Mkurugenzi wa manispaa ya Ilala Isaya Mgulumi (mwenye miwani) akiwaeleza mawaziri wa Wizara ya Afya, Maendeleo ya jamii, Jinsia, Wazee na Watoto, Ummy Mwalimu (katikati) na Waziri wa Kilimo na Mifugo, Mwigulu Nchemba (kushoto) akiwaelezea hali ya ukarabati wa machinjio hayo.Waziri wa Kilimo, Mifugo na Uvuvi Mh. Mwigulu Nchemba kwa pamoja na Waziri wa Afya, Ustawi wa Jamii, Jinsia, Wazee na Watoto, Mhe. Ummy Mwalimu wametembelea machinjio ya Vingunguti na kuona jinsi hali ilivyo katika eneo hilo.Pamoja na kutembelea eneo hilo ambalo lilikuwa limefungiwa kuchinja nyama, mawaziri hao wameruhusu kwa siku tatu kuchinja huku wakitoa maagizo kwa Halmshauri ya Manispaa

EFM yaendelea kugawa Ndinga Dar

EFM REDIO YAENDELEA NA SHINDANO LAKE LA SHIKA NDINGA,WIKI HII ILIKUWA WILAYA YA ILALA

Meneja Mkuu wa Efm redio, Denis Sebo akiwa katika picha ya pamoja na washidi wa shindano la shika ndinga walioshinda pikipiki kwenye viwanja vya Jica Shule Ilala jijini Dar es salaam. Kulia ni Zainabu Mhagama na kushoto ni Said Abdallah.
Washiriki wa Shindano hilo wakiendelea kushindana kwenye viwanja vya Jica Shule Ilala jijini Dar es Salaam.
Meneja Mkuu wa Efm redio, Denis Sebo akiwatazama washiriki wa kwenye viwanja vya jica Shule Ilala jijini Dar es Salaam.
Mtangazaji wa kipindi cha uhondo Adam Melele a.k.a Swebe Santana wa Efm redio akimkaribisha Meneja wa Mauzo wa Star Times, Juma Mchina Sharobaro ili atowe zawadi kwa washindi wa tatu na wa pili kwenye viwanja vya jica Shule Ilala jijini Dar es Salaam.
.Meneja wa Mauzo wa Star Times, Juma Mchina Sharobaro akiwa na washiriki wa shindano hilo mara baada ya kuwapatia zawadi, jijini Dar es Salaam.
Meneja Masoko wa Vodacom Materi Mushi akiwakatika picha ya pamoja na washiriki wa shindano hilo mara baada ya kuwapatia zawadi, jijini Dar es Salaam.
Watu wa huduma ya kwanza wakiwahudumia washiriki wa Shindano hilo
Wananchi wa wakifatilia mashindano hayo kwenye viwanja vya jica Shule Ilala jijini Dar es Salaam.(Picha na Emmanuel Massaka wa Globu ya jamii)
Kilango atoa ya moyoni

Kilango atoa ya moyoni


  • Aibukia kanisani na kufananisha mjamzito aliyejifungua mwanawe akafariki dunia..
ALIYEKUWA Mkuu wa Mkoa wa Shinyanga, Anne Kilango Malecela, ameibukia kanisani na kutoa ya moyoni, ikiwa siku tano baada ya Rais Dk. John Magufuli kutengua uteuzi wake.

Kilango, ambaye Jumatatu wiki hii uteuzi wake ulitenguliwa baada ya Machi 20, mwaka huu, kudai kuwa mkoa wa Shinyanga hauna mtumishi hewa wa serikali hata mmoja.
Hata hivyo, Ikulu ilifanya uchunguzi na kubaini kuwa katika taarifa za awali kuna watumishi hewa 45, huku kazi ya uhakiki ikiendelea katika wilaya za Ushetu na Shinyanga.
Rais Magufuli aliwaagiza wakuu wa mikoa wote, alipokuwa akiwaapisha kuwa wafanya uchunguzi kuhusu uwapo wa watumishi hewa katika mikoa yao na kutoa taarifa.
Kutokana na kutoa taarifa hizo zisizo za kweli, Jumatatu wiki hii, Rais Magufuli alitangaza kutengua uteuzi wake, akiwa amekaa kwenye nafasi hiyo kwa siku 27. Kilango amekuwa mkuu wa mkoa wa 19 tangu kuanzishwa kwa mkoa huo.
Mbali na Kilango, Rais Magufuli pia alimsimamisha kazi Katibu Tawala wa Mkoa wa Shinyanga, Abdul Dachi, kutokana na taarifa hizo za kutokuwapo watumishi hewa katika mkoa.
ALIYOSEMA KANISANI
Akiwasalimia waumini wenzake juzi, katika Kanisa la Kiinjili la Kilutheri Tanzania (KKKT), Dayosisi ya Kusini Mashariki ya Ziwa Victoria, mjini Shinyanga, baada ya kupewa fursa ya kusema neno, Kilango alisema anamshukuru Mungu kwa kila jambo kwa yote yaliyomtokea.
“Ndugu waumini wenzangu, hili ni jambo la kumshukuru Mwenyezi Mungu. Hata mtu unapojifungua mtoto akafariki dunia, unamshukuru Mungu kwani hayo ni mapenzi ya Mungu.
"Ukiona mzazi wako kafariki dunia pia, unamshuruku Mungu. Tunao wajibu wa kumshukuru Mungu kwa kila jambo,” alisema kwa maneno mafupi na kisha kuketi, huku akiacha simanzi miongoni mwa waumini wenzake, wakiwamo viongozi wa kanisa.
ALIVYOANZA KAZI
Mbele ya kikao cha Kamati ya Ushauri ya Mkoa (RCC), muda mfupi baada ya kuanza kazi, Kilango alisema Shinyanga ni mkoa wenye changamto nyingi ambazo atazishughulikia, lakini atakuwa akilazimika kukimbia Dar es Salaam kumwona mwenzi wake, Mzee John Malecela ambaye ni mgonjwa, na pindi hali yake ikiimarika wataungana naye mjini Shinyanga.
Hayo aliyasema Machi 22, mbele ya wajumbe wa kikao cha kamati hiyo na Ijumaa Machi 25, alisali kanisani hapo.
Sambamba na hayo, aliahidi kupambana na watumishi wazembe na wale wanaoendekeza rushwa na ufisadi na kurejesha hadi ya mkoa wa Shinyanga kimaendeleo.
Kilango ambaye yuko mjini Shinyanga, akisubiri kukabidhi ofisi kwa mrithi wake kwa mujibu wa utaratibu, bado anaishi hotelini kwa vile aliyekuwa Mkuu wa Mkoa huo, Ally Rufunga, hajaondoka katika nyumba ya serikali iliyoko Ikulu ndogo, eneo la Lubaga.
ALICHOKISEMA MAGUFULI
Wakati akipokea hundi ya Sh. bilioni sita kutoa kwa Naibu Spika wa Bunge, Dk. Tilia Ackson, Rais Magufuli alisema aliwapa wakuu wa mikoa siku 15 wakasimamie watumishi hewa, ambazo zilimalizika Machi 31, mwaka huu.
Alisema katika siku hizo 15, aliwaruhusu kufanya kazi hiyo kwa uhuru na kuwaahidi hakutatokea kitu chochote na kwamba walifanya kazi vizuri.
Rais Magufuli alisema watumishi hewa waliopatikana ni 5,507 ambao walikuwa wanalipwa mishahara na miongoni mwao walikuwamo wanafunzi, waliokufa na waliofungwa.
Alisema serikali imekuwa ikitenga Sh. bilioni 583 kulipa mishahara na kati ya fedha hizo hulipwa watumishi hewa.
“Ninaamini uchambuzi utaendelea kufanyika ili kuokoa mabilioni ya fedha. Wizara ya Utumishi na ya Fedha muendelee kufanya kazi hiyo,” alisema Magufuli.
Alisema zaidi ya Sh. bilioni 53 zilikuwa zinapotea kwa kuwalipa watumishi hewa 5,507.
Rais Magufuli alisema watumishi hewa hawako katika halmashauri tu, bali wako kila idara ya serikali, zikiwamo Ofisi ya Rais, Ofisi ya Waziri Mkuu, vyombo vya ulinzi na usalama, Wizara ya Afya, Maendeleo ya Jamii, Jinsia, Wazee na Watoto na hata Wizara ya Fedha na Mipango.
Alisema wakati akiwaapisha wakuu wa mikoa kwa kutambua tatizo hilo kuwa ni kubwa, aliwapa agizo hilo na wengi waliitikia wito na kufanya kwa ufanisi.
Rais Magufuli alisema akiwa wilayani Chato, aliona taarifa zikitolewa na wakuu wa mikoa kuhusu watumishi hewa, lakini alishangaa kusikia Mkuu wa Mkoa wa Shinyanga (Kilango), akisema katika mkoa wake hakuna mtumishi hewa hata mmoja.
“Nilijiuliza ni kweli? Nikatoa maagizo nikiwa Chato kuwa watu waende 'ku-verify' (kuthibitisha) katika kila wilaya kama kweli hakuna watumishi hewa. Hadi jana usiku (Jumapili usiku) walipatikana watumishi hewa 45 na bado wilaya mbili zilikuwa hazijahakikiwa,” alisema.
“Niilijiuliza sana, nikajiuliza sana na kweli nilijuliza maswali mengi kwa masikitiko mengi kwa nini mkuu wa mkoa alizungumza vile wakati hakukuwa na adhabu yoyote, lengo lake lilikuwa nini?
“Je, kama ni mkuu wa wilaya au wasisidizi wake walimdanganya kwa nini na yeye alidanganya, ni shetani gani aliyemkumba? “Nimeamua nitengue uteuzi wa mkuu wa mkoa wa Shinyanga na atapangiwa kazi nyingine pamoja na katibu tawala wa mkoa,” alisema Magufuli.

by Nipashe

Bajeti ya awamu hii ya serikali itaizidi ile ya awamu ya nne kwa Shilingi Trioni 7.1

Bajeti ya kwanza ya Serikali ya Awamu ya Tano itaizidi ya Serikali ya Awamu ya Nne kwa Sh7.1 trilioni baada ya Waziri wa Fedha kutangaza sura ya bajeti ya mwaka 2016/17 inayoonyesha kutakuwa na makusanyo na matumizi ya Sh29.5 trilioni. 

Sura hiyo ya bajeti ya mwaka 2016/17 inatofautiana na iliyopita iliyokuwa ya Sh22.45 trilioni katika maeneo mengi, ikiwa ni pamoja na kiwango cha fedha kitakachotengwa kwa ajili ya shughuli za maendeleo, ambacho ni zaidi ya mara mbili ya fedha za eneo hilo katika bajeti iliyopita.
Waziri wa Fedha, Dk Phillip Mpango alisema wakati akiwasilisha mapendekezo ya kiwango cha ukomo wa bajeti jijini Dar es Salaam jana kuwa kati ya fedha hizo, Sh18.46 trilioni, ambazo ni sawa na asilimia 62.5 ya bajeti yote, zitatokana na jumla ya mapato ya ndani yanayohusisha na halmashauri.
Kiwango hicho kimezidi Sh3.64 trilioni ya bajeti iliyopita ambayo ililenga kukusanya Sh14.82 trilioni.
“Kati ya mapato hayo, Serikali inalenga kukusanya mapato ya kodi ya jumla ya Sh15,105 bilioni, sawa na asilimia 82 ya mapato ya ndani,”alisema Dk Mpango.
Alisema makisio ya mapato ya kodi na yasiyo ya kodi yameongezeka kwa kuwa kuna viashiria vingi vinavyoonyesha kwamba Mamlaka ya Mapato (TRA) kwa kushirikiana na wizara na taasisi zinazokusanya maduhuli, zina uwezo wa kukusanya kiasi hicho.
Alisema: “Kipaumbele cha kwanza cha Serikali kitakuwa ni kujizatiti katika ukusanyaji wa mapato kwa kubuni vyanzo vipya na kuendelea kudhibiti mianya mbalimbali ya ukwepaji wa kodi. Suala hili linahitaji ushirikiano wa karibu na wananchi ili tujiletee maendeleo ya haraka kwa kushiriki kulipa kodi na kuwafichua wakwepa kodi kwa kuwaona kama maadui wa maendeleo yetu.”
Kwa mujibu wa Dk Mpango, Sh17.72 trilioni zitakuwa kwa ajili ya matumizi ya kawaida, wakati Sh11.82 trilioni, sawa na asilimia 40 ya bajeti nzima, zimetengwa kwa ajili ya shughuli za maendeleo.
Katika bajeti iliyopita, matumizi ya kawaida yalitengewa Sh16.7 trilioni, sawa na asilimia 74.3 wakati shughuli za maendeleo zilipangiwa Sh5.76 sawa na asilimia 25.9.
“Asilimia 40 kwenda kwenye mipango ya maendeleo, hili ni jambo jema,” alisema Freeman Mbowe, ambaye ni mwenyekiti wa Chadema na kiongozi wa kambi ya upinzani bungeni, alipoongea na waandishi.
“Kwamba tumepunguza matumizi ya kawaida ya Serikali na kuelekeza fedha zaidi kwenye mipango ya maendeleo, nasema hili ni jambo jema kama litatekelezeka.”
Vipaumbele
Kwa mujibu wa Dk Mpango, shughuli zitakazopewa kipaumbele kwenye mipango hiyo ya maendeleo zimegawanywa katika maeneo manne ambayo ni viwanda vya kukuza uchumi na ujenzi wa msingi wa uchumi wa viwanda, kufungamanisha maendeleo ya uchumi na rasilimali watu, mazingira wezeshi kwa uendeshaji biashara na uwekezaji na pia usimamizi wa utekelezaji wa mpango.
Dk Mpango alisema washirika wa maendeleo wanatarajiwa kuchangia Sh3.6 trilioni, ikiwa ni ongezeko la Sh1.7 trilioni kulinganisha na Sh1.88 trilioni zilizokuwa zinategemewa kwenye bajeti iliyopita.
Fedha hizo zitakuwa za misaada na mikopo nafuu kutoka nje ambayo ni pamoja na GBS, Basket Fund na miradi ya maendeleo.
Aidha Serikali inatarajia kukopa Sh5,374.3 bilioni kutoka soko la ndani kwa ajili ya kulipia hati fungani na dhamana za Serikali zinazoiva pamoja, wakati kutoka kwenye soko la nje kwa masharti ya kibiashara inatarajia kukopa Sh2.1 trilioni.
Awali Spika Job Ndugai alisema kwa mujibu wa utaratibu mapendezo hayo yalipaswa kuwasilishwa tangu Machi 11, lakini kutokana na ratiba za wabunge wengi kuwa kwenye majimbo yao, aliamua kuongeza siku.
“ Sasa ninawashauri wabunge wote kwenda kuyasoma mapendekezo hayo vyema ili mpate nafasi ya kuchangia fedha bajeti itakapowasilishwa bungeni. Pia mhudhurie kwenye vikao vya kamati zenu ili kujipanga vyema. Wale watakaokuwa hawaonekani kwenye vikao, tutawasilisha majina yao kwenye vyama vyao ili wachukuliwe hatua zinazostahili.”
Miradi ya maendeleo
Katika kuongeza wigo wa makusanyo ya kodi, Dk Mpango alisema sera za mapato kwa mwaka 2016/2017 itajielekeza kufanya tathimini ya mkupuo ya majengo ili kuongeza mapato.
Katika mpango wa kuifanya Tanzania kuwa nchi ya viwanda, Dk Mpango alisema kipaumbele kitakuwa ni mradi wa magadi soda ulioko kwenye Bonde la Engaruka ambako utafiti umebaini kuna magadi ya mita za ujazo bilioni 4.68 ambazo huongezeka kila mwaka kwa mita milioni 1.9 za ujazo.
“Mradi utahusisha kiwanda cha kuzalisha tani milioni moja za magadi kwa mwaka kwa ajili ya matumizi ya viwanda, hususan madawa, vioo na sabuni,” alisema.
Mradi huo utakapokamilika utaliingizia taifa Sh 400 bilioni kwa mwaka.
Eneo jingine ni kufufua kiwanda cha General Tyre cha Arusha, ambacho kimetengewa Sh2 bilioni kwa kazi hiyo. Pia kiwanda cha viuadudu kilichopo Kibaha mkoani Pwani ambacho mradi wake utatekelezwa kwa awamu tatu, mbili za mwisho zikihusisha ujenzi wa kiwanda cha mbolea na cha virutubisho.
Pia mpango huo utahusisha uendelezaji wa viwanda vidogo mkoani Morogoro, Dar es Salaam, Mbeya na Mwanza.
Katika kufunganisha maendeleo ya uchumi na rasilimali watu, Serikali itaweka nguvu kwenye elimu na mafunzo ya ufundi, ikihusisha kuimarisha mifumo, majengo na miundombinu katika shule za awali, msingi na sekondari.
Pia itahusisha ukarabati, upanuzi na ujenzi wa vyuo vikuu, mradi wa upanuzi wa Chuo Kikuu Kishiriki cha Elimu (Mkwawa, Duce, Udom na OUT, Ardhi, Mzumbe, Sokoine, Muhimbili, Ushirika, Chuo Kikuu cha Sayansi cha Mwalimu Nyerere na pia mikopo ya wanafunzi wa elimu ya juu.
Eneo hilo litahusisha uendelezaji ustawi wa jamii kwa kuangalia huduma za afya, maji, kazi na ajira, na uwezeshaji wananchi kwa kutoa Sh50 milioni kwa kila kijiji.
Mazingira wezeshi
Katika kujenga mazingira wezeshi, Serikali itaongeza uwezo wa uzalishaji umeme, usambazaji umeme mijini na vijijini, ujenzi wa kiwanda cha kupokea, kuchakata na kubadilisha gesi asilia kuwa katika kimiminika kwa ajili ya kusafirisha nje, ujenzi wa miundombinu ya kusafirisha gesi asilia, ujenzi wa miundombinu ya usafiri, teknolojia ya habari na mawasiliano, miradi ya makaa ya mawe na mradi wa chuma wa Liganga.

KATIBU MKUU IKULU AKABIDHI GARI JIPYA LA WAGONJWA KWA HOSPITALI YA WILAYA YA CHALINZE


Rais wa Jamuhuri ya Mungano wa Tanzania Dkt John Pombe Magufuli amekabidhi  gari la kubebea wagonjwa kwa hosipitali ya wilaya ya Chalinze, Ikiwa ni utekelezaji wa ilani na  ahadi ya uchaguzi ya Chama Cha Mapinduzi CCM kwa wananchi ikiwa ni pamoja na wa jimbo la Chalinze.

Gari hilo la kubebea wagonjwa limekabidhiwa kwa niaba ya Rais, na Katibu Mkuu Ikulu Peter Ilomo kwa  Mbunge wa Jimbo la Chalinze Mheshimiwa Ridhiwani Kikwete Ikulu jijini Dar es Salaam.

Akizungumza mara baada ya kukabidhi gari hilo, Katibu Mkuu Ikulu Ndugu Peter Ilomo amesema gari hilo limetolewa na Mheshimiwa Rais kwa hosipitali hiyo ikiwa ni kuitikia wito na utekelezaji wa ilani na ahadi ya uchaguzi ya Chama Cha Mapinduzi CCM ya kuboresha huduma ya afya kwa wananchi wake kote nchini.

Aidha, Ndugu Ilomo amewaomba viongozi wa jimbo la Chalinze kulitumia gari hilo kwa matumizi yaliyokusudiwa ya kuwahudumia wananchi wa eneo hilo.

Akipokea gari hilo kwa niaba ya wananchi wa jimbo na  Wilaya ya Chalinze, Mbunge wa jimbo la Chalinze Mheshimiwa Ridhiwani Kikwete amemshukuru Mheshimiwa Rais    Dkt. John Pombe Magufuli kwa msaada huo na kuahidi kulitumia gari hilo kwa malengo yaliyokusudiwa, na kusema kuwa, utendaji kazi wa Rais Magufuli umekuwa ukiungwa mkono na wananchi wa kada mbalimbali na kuwaomba watanzania kuzidi kumuombea kwa Mungu.

Kwa upande wake Dakta Nasoro Ally Matuzya, amesema gari hilo limekuja kwa wakati muafaka kwa kuwa umezingatia utekelezaji wa malengo ya Milenia hususan lengo namba nne  linalosisitiza kupunguza vifo vya mama wajawazito na watoto chini ya miaka mitano

Naye Mwenyekiti wa Halmshauri ya Wilaya ya Chalinze Ndugu Saidi Omar Zikatimu amesema gari hilo la kubebea wagonjwa litakuwa msaada mkubwa kwa wananchi wa jimbo hilo la Chalinze hususan katika kusaidia kutoa wagonjwa ambao wako katika maeneo ya vijijini wilayani humo na kuwafikisha katika hospitali ya Chalinze na hivyo kunusuru maisha yao kwa kupata huduma za afya kwa haraka.

Mbali na Wilaya ya Chalinze kupata msaada wa gari hilo la kubebea wagonjwa, tayari magari mengine mawili ya kubebea wagonjwa yameshakabidhiwa katika vituo vya afya vya Kiroka na Kisemu mkoani Morogoro.

Hospitali mpya ya Wilaya ya Chalinze imepanda hadhi kutoka kituo cha Msoga ambayo ilikuwa haina gari la kubebea wagonjwa na hivyo kufanya usafirishaji wa wagonjwa kutoka hospitali hiyo hadi hospitali ya rufaa ya Mkoa wa Pwani ya Tumbi au kutoka maeneo ya vijijini kuwa mgumu.

Imetolewa na Kurugenzi ya Mawasiliano ya Rais Ikulu

18 Machi 2016.

DKT. MPANGO AKUTANA NA WABUNGE KUTOKA NCHINI SWEDEN


Waziri wa Fedha na Mipango Dkt. Philip Mpango akizungumza na Wabunge kutoka nchini Sweden (hawapo pichani) leo jijini Da es salaam wakati wa mkutano uliofanyika Wizarani hapo, kuhusu ushirikiano wa kimaendeleo kati ya Tanzania na Sweden. Kulia ni Mdhibiti na Mkaguzi Mkuu wa Hesabu za Serikali (CAG) Prof. Mussa Assad.
Waziri wa Fedha na Mipango Dkt. Philip Mpango akizungumzia vipaumbele vya Serikali wakati wa mkutano na Wabunge kutoka nchini Sweden leo jijini Dar es salaam kwa ziara ya kikazi nchini.


Waziri wa Fedha na Mipango,Mhe. Dkt. Philip Mpango amekutana na Wabunge wa Sweden katika ukumbi wa Wizara hiyo, kuzungumzia ushirikiano baina Tanzania na Sweden.

Katika mazungumzo yake na wabunge hao ambao wamewasili nchini kwa  ziara ya kikazi, Dkt. Mpango amesema Serikali ya Awamu ya Tano ipo makini na inafanyakazi kwa ufanisi ili kuhakikisha Watanzania wanapata huduma stahiki kutokana na rasilimali zilizopo nchini.

Amesema Serikali imejipanga kuongeza kasi ya ukusanyaji mapato ya ndani ili kuiwezesha nchi kujiendesha yenyewe na kuacha kutegemea misaada ya wahisani.

Aidha, amefafanua kuwa Tanzania imejipanga kuongeza vyanzo vya ukusanyaji mapato pamoja na kuboresha  vyanzo vilivyopo na kuhakikishakila Mwananchi anayestahilikulipakodistahikianalipa kwa wakati.

“Ni aibu kwa nchi yenye rasilimali za kutosha Wananchi wake kuishi katika hali ya umasikini, tunachotakiwa ni kuboresha kilimo kwa sababu wananchi wengi ndicho wanachotegemea”, alisema.

Akizungumzia vipaumbele vya Serikali katika mkutano huo, Dkt. Mpango alisema mkazo umewekwa zaidi katika kufanya mapinduzi ya viwanda, ambapo nchi inaanzakuboresha viwanda vilivyopo hususani vile ambavyo hutumia rasilimali zinazopatikana nchini kama zile zinazotokana na kilimo.

Aliongeza kuwa katika kuboresha viwanda pia Serikali ipo katika hatua za kuboresha soko la ndani na nje ya nchi kwa bidhaa zinazozalishwa na viwanda hivyo.

Dkt. Mpango alisema sambamba na kufanya mapinduzi ya viwanda, Tanzania imejipanga kuboresha miundombinu ambapo mpaka sasa kuna miradi mbalimbali ya maendeleo imeanzishwa kama mradi wa umeme vijijini.

Alisema katika suala la umeme, nchi imeazimia kujikita katika uzalishaji wa kutumia vyanzo vingine kama gesi asilia, jua na upepo kuliko kutegemea maji pekee.

Kuhusu sekta ya usafirishaji, Dkt. Mpango amesema Serikali imejipanga kuboresha bandari zote nchini na kuzifanya ziwe za kisasa ili kuhamasisha biashara za ndani na nje ya nchi kupitia bandari hizo.

Hata hivyo, Dkt. Mpango alikiri kuwa uboreshaji wa reli ya kati ni changamoto kwani reli hiyo haiwezi kuboreshwa kwa kutumia fedha za bajeti ya Serikali pekee, hivyo Serikali inajitahidi kutafuta njia za kufanikisha ujenzi huo. 

Katika mkutano huo, Dkt. Mpango alizungumzia suala la huduma za kijamii alisema, nchi imejipanga kutoa elimu inayoendana na soko la ajira na Serikali imeanza kutoa elimu ya msingi na sekondari bila malipo ili kuwawezesha wananchi wengi kupata elimu.

Akizungumzia suala la uchumi, Dkt. Mpango alisema hali ya uchumi kwa sasa ni nzuri kwani pato la ndani la Taifa limefika asilimia 7 katika miaka ya hivi karibuni.

Dkt. Mpango alisema ili kufanikisha vipaumbele hivyo, ni lazima maadili na nidhamu ya kazi vifuatwe na watendaji pamoja na watumishi wa umma katika utekelezaji wa majukumu yao.

Aliongeza kuwa Serikali ipo msatari wa mbele kupambana na rushwa na haitosita kuhakikisha watu wote wanaohusika na rushwa wanachukuliwa hatua za kisheria.

Kwa upande  Wabunge kutoka nchini Sweden, wakiongozwa na Mwenyekiti wa Kamati ya Mambo ya Nje, Kenneth Forslund, wameipongeza Serikali ya Awamu ya Tano kwa jitihada mbalimbali zinazochukuliwa katika ukusanyaji wa  mapato ya ndani na kutoa huduma za kijamii.

Tanzania na Swede nzime kuwa na ushirikiano wa muda mrefu ambao umeifaidisha Tanzania katika shughuli mbalimbali za maendeleo ikiwemo kuendeleza miradi ya afya na umeme hususani vijijini, elimu pamoja na kusaidia kukamilisha bajeti ya kila mwaka.

PROF. MAGEMBE AZUNGUMZIA KUDUTUNGULIWA KWA HELKOPTA YA DORIA MBUGANI

Waziri Wa Maliasili Na Utalii Prof. Jumanne Maghembe Azungumzia Tukio La Kushambuliwa Helkopta Ya Doria Iliyopelekea Kifo Cha Rubani Wake.

Mpekuzi blog


 
TAARIFA KWA VYOMBO VYA HABARI KUHUSU TUKIO LA KUSHAMBULIWA KWA HELKOPTA YA DORIA NA KUUAWA KWA RUBANI ROGERS GOWER TAREHE 29/01/2016

1.0 UTANGULIZI

Itakumbukwa kuwa mnamo tarehe 29/01/2016 lilitokea tukio la kuhuzunisha ambapo majangili walishambulia helikopta iliyokuwa inafanya doria katika maeneo ya Pori la Akiba Maswa na Ranchi ya Wanyamapori ya Mwiba. Shambulio hilo lilisababisha kifo cha Rubani Bw. Rogers Gower raia wa Uingereza na kuharibika vibaya kwa helkopta hiyo baada ya kuanguka. Aidha, katika tukio hilo Bw. Nick Desta aliyekuwa pamoja na Bw. Rogers aliweza kunusurika na kukimbizwa Nairobi kwa ajili ya matibabu zaidi.

Tarehe 30/01/2016 nilitembelea eneo la tukio ili kujionea hali halisi na kutoa tamko la serikali. Haiyumkini, kutokana na kuguswa na kadhia hiyo, Mhe. Rais wa Jamhuri ya Muungano wa Tanzania, Dkt. John P. Magufuli alitoa maelekezo kwa Wizara ya Maliasili na Utalii ya kuanza kufanya msako haraka wa kuhakikisha kuwa wahalifu hao wanakamatwa na kufikishwa kwenye vyombo vya Sheria. Aidha, Katibu Mkuu wa Wizara ya Maliasili na Utalii, Major Gen. Gaudence Millanzi akifuatana na Mwenyekiti wa Bodi  ya Mamlaka ya Usimamizi wa Wanyamapori Tanzania (TAWA), Major Gen. Hamisi Semfuko na baadhi ya watendaji wa Wizara walitembelea eneo hilo tarehe 02 hadi 03/02/2016.

Napenda kuwajulisha kuwa, katika ziara zote mbili tuliweza kushuhudia namna watendaji wa Wizara ya Maliasili na Utalii (Pori la Akiba Maswa, Kikosi Dhidi Ujangili Bunda, Hifadhi ya Taifa Serengeti na Mamlaka ya Hifadhi Ngorongoro)  kwa kushirikiana na vyombo vya Ulinzi na Usalama vya Taifa na vya Mkoa wa Simiyu na Wilaya ya Meatu na Maofisa kutoka Makao Makuu ya Wizara ya Mambo ya Ndani ya Nchi, Viongozi  wa FRIEDKIN CONSERVATION FUND, Bw. Dan Friedkin na Bw.  Pratik Patel na watumishi wengine kwa pamoja walisaidiana sana katika kuendesha msako kwa juhudi kubwa na weledi wa hali ya juu. Kazi hii ilifanyika usiku na mchana katika mazingira magumu na hatarishi. Mara kadhaa watendaji hao wamekuwa wanalazimika kuvuka makorongo na mito yenye maji mengi kwa kuogelea kutokana na mvua zinazoendelea kunyesha katika maeneo hayo.

Mtakumbuka kuwa taarifa zilizopatikana baada ya tukio hilo la kusikitisha zilibainisha kuwa majangili waliohusika na tukio hilo walikuwa watatu (03) na kwamba walikuwa na bunduki mbili aina ya rifle zenye ukubwa wa mtutu (calibre) wa 303 na .458 mtawalio. Aidha, wakati wa tukio hilo, majangili hao tayari walikuwa wamefanikiwa kuua tembo mmoja na kutoweka na meno yake mawili.

2.0 HATUA ZILIZOFIKIWA:
Kama mlivyosikia kwenye taarifa iliyotolewa na Kamanda wa Polisi wa Mkoa wa Simiyu, sote kwa pamoja tunafarijika kuwajulisha kuwa jitihada zilizofanyika za kuwasaka wahalifu hao ndani ya kipindi cha wiki moja zimeleta matokeo mazuri ambapo:

· watuhumiwa wote muhimu (key suspects) waliotajwa kuhusika na tukio hilo wamekamatwa na wote wamekiri kuwepo kwenye tukio. Mmojawapo anatuhumiwa kuhusika moja kwa moja na kufyatua risasi iliyosababisha kuanguka kwa ndege hiyo na hatimaye kifo cha rubani.

·  bunduki mbili zilizotumika aina ya Rifle Calibre 303 na .458 zinazoshukiwa kutumika kwenye uhalifu huo zimekamatwa pamoja na risasi 5 za .458 na moja ya 303;

·   meno mawili ya tembo aliyeuawa siku ya tukio yenye uzito wa kilo 31 yamekamatwa;

·   pikipiki moja ambayo inashukiwa kuhusika katika tukio hilo na matukio mengine ya uhalifu imekamatwa;

·  raia wema wanaendelea kutoa taarifa zinazobainisha kuwepo kwa mtandao mkubwa wa ujangili katika Mkoa wa Simiyu na maeneo ya jirani. Taarifa hizo zimesaidia kupanua wigo wa operesheni na kuwezesha kuboresha mbinu za mapambano dhidi ujangili.

3.0 MPANGO MAHSUSI WA WIZARA KUIMARISHA MAPAMBANO DHIDI  UJANGILI NA USAFIRISHAJI HARAMU WA MAZAO YA WANYAMAPORI NA MISITU

Tukio hili limetoa funzo kubwa kwa nchi yetu na linadhihirisha kuwa hivi sasa  baadhi ya majangili wamefikia hatua ya kujijengea uthubutu na ujasiri wa kutisha.

Kutokana na mazingira haya, Wizara ya Maliasili na Utalii imeamua kurejea (review) kwa haraka na kwa upana zaidi mbinu na mikakati yake ya vita dhidi ujangili wa wanyamapori na mazao ya misitu pamoja na usafirishai haramu wa mazao ya wanyamapori na misitu  kwa kufanya yafuatayo:

1.   Kukamilisha haraka uanzishaji wa Kikosi Maalum cha Kupambana na Uhalifu  wa wanyamampori (Wildlife Crime Unit);

2.   Kikosi hiki kitaundwa kwa kushirikisha Taasisi zote za Wizara (Idara ya Wanyamapori, Mamlaka ya Usimamizi wa Wanyamapori Tanzania (TAWA), Hifadhi za Taifa (TANAPA), Mamlaka ya Hifadhi ya Ngorongoro (NCAA) na Wakala wa Huduma za Misitu Tanzania (TFS). Aidha, kitafanya kazi kwa karibu na Vyombo vya Ulinzi na Usalama, Sheria, Mamlaka ya Bandari, Viwanja vya Ndege, Mamlaka ya Mapato Tanzania, Taasisi za Uhifadhi za ndani na nje ya Nchi na wadau wengine wa Uhifadhi;

3.   Kikosi hiki kitakuwa na jukumu la kuratibu na kufuatilia utendaji wa vikosi vidogo (Taskforce Coordinating Groups TCGs)) vilivyoundwa kwenye kanda nane za kiikolojia (ecosystem approach) ili kukabili kwa haraka nyendo zote za ujangili wa wanyamapori, uvunaji na usafirishaji haramu wa mazao ya wanyamapori na misitu;

4.   Kuharakisha ukamilishaji wa kubadilisha muundo wa utendaji kazi wa Wahifadhi Wanyamapori kutoka mfumo wa Kiraia  kuelekea mfumo wa Jeshi Usu (Paramilitary);

5.   Kuharakisha usimikaji wa Mamlaka ya Usimamizi wa Wanyamapori Tanzania (TAWA) iliyozinduliwa Oktoba 2015 katika jitihada za kuimarisha na kuboresha uwekezaji binafsi wa Serikali katika maeneo yaliyopo nje na ndani ya Hifadhi za Taifa na Mamlaka ya Hifadhi ya Ngorogoro;

6.   Kurejesha utaratibu wa kuwa na kada ya walinzi wa misitu (Forest Rangers) ambao watakuwa na uwezo wa kutumia silaha ambapo pamoja na kudhibiti uvunaji haramu wa misitu, utapanua wigo wa kukabili ujangili katika Hifadhi za Misitu;

7.   Kuishauri serikali kuangalia upya endapo bado kuna sababu za msingi kwa wananchi kuendelea kununua na kumiliki bunduki zenye mitutu mikubwa. Uamuzi huu unatokana na kuongezeka kwa matukio ya kukamatwa kwa silaha hizo zikiwa zinatumika kwenye vitendo vya uhalifu nje ya mikono ya wamiliki halali;

8.   Kuboresha utendaji kazi wa wahifadhi kwa kuwapatia mafunzo ya mbinu mpya za ukusanyaji habari na ufuatiliaji wa nyendo za majangili (intelijensia), kukusanya na kutunza kumbukumbu za ushahidi na kuendesha mashtaka (Inteligence, investigation and prosecution);


9.   Kuimarisha upatikanaji wa vifaa vya kisasa ikiwa ni pamoja na kuwashirikisha wadau wa uhifadhi katika kuchangia ununuzi/upatikanaji wa vifaa hivyo ili kukabili kasi ya mbinu mpya zinazotumiwa na majangili na wasafirishaji haramu wa mazao ya wanyamapori na misitu;
10.                Kwa kuwa katika Operesheni hiyo, wako Askari wa Wanyamapori wanaotuhumiwa kushiriki katika uhalifu wa kijangili, askari hao watafikishwa katika Mahakama ya kijeshi ili kukabiliana na mashitaka ya kijeshi ya kukiuka kiapo na dhamana waliyopewa.


4.0 HITIMISHO
Napenda kutumia fursa hii kutambua na kuwapongeza watendaji wote, Uongozi wa Mkoa wa Simiyu na Wilaya ya Meatu.  Napenda kupongeza na kuishukuru  Wizara ya Mambo ya Ndani ya Nchi, Jeshi la Polisi, Jeshi la Wananchi, Usalama wa Taifa Shirika la Friedkin Foundation  na  wadau wengine wote walioshiriki katika msako huu hadi kufanikisha na kutimiza azma iliyokusudiwa na Mhe. Rais wa Jamhuri ya Muungano wa Tanzania  Dkt. John Pombe Magufuli pamoja na Watanzania wote wenye mapenzi mema na Taifa letu.

Kama nilivyotangulia kueleza, pamoja na mazingira magumu yaliyojitokeza wakati wa kutekeleza kazi hii, washiriki wote waliweza kuendesha operesheni hii kwa ari kubwa na weledi wa hali ya juu hadi kukamilisha lengo kuu  ndani ya kipindi kifupi. Aidha, naomba kuwashukuru wananchi wote ambao kwa namna ya pekee waliweza kutoa ushirikiano kwa kutoa taarifa muhimu zilizoweza kufanikisha lengo hili.

Pia nawashukuru wadau wote walioweza kutoa michango ya hali na mali kwa watendaji wa operesheni hii. Michango yao ilikuwa chachu kwa washiriki wa operesheni kuwajengea mazingira kuendelea kujituma kwa kupunguza makali ya ugumu wa mazingira wakati wanatekeleza jukumu hili.  Aidha, natoa wito kwa wananchi wote waendelee kuisaidia Wizara katika vita hii kubwa ya kukabili ujangili na usafirishaji haramu wa rasilimali zetu.


Imetolewa na:
Waziri wa Maliasili na Utalii
09/02/2016


Mpekuzi blog
TAMKO LA SERIKALI YA TANZANIA KIFO CHA MWANAFUNZI HUKO INDIA HILI HAPA

TAMKO LA SERIKALI YA TANZANIA KIFO CHA MWANAFUNZI HUKO INDIA HILI HAPA



Waziri Mahiga ametoa ufafanuzi huo leo bungeni, na kuthibitisha ni kweli wanafunzi hao wamefanyiwa vitendo hivyo, ambavyo watanzania walikuwa wanavisikia bila kuwa na taarifa rasmi.
“Wananchi wa India walichoma gari lake, na punde kidogo gari lingine lilifuata likiwa na wanafunzi wanne watanzania, mmoja msichana na watatu wavulana, walilisimamisha lile gari na kuwavuta wale wanafunzi nje, na wakamchukua yule msichana na kumvua nguo na kuanza kumtembeza barabarani uchi, wale wavulana walipigwa na gari lao lilichomwa, katika gari lile kulikuwa na simu zao na documents mbali mbali nazo ziliteketea”, alisema waziri Mahiga.

Waziri Mahiga aliendelea kwa kusema kuwa baada ya hapo askari wa India walifika lakini hawakuonyesha ushirikiano wa kutosha, lakini wanafunzi hao walipelekwa hospitali na kupatiwa matibabu ya majeraha waliyokuwa nayo, lakini walilazimika kuondoka mapema kwa kuwa hawakuwa na pesa.

“Baada ya hapo ubalozi wetu wa India uliandika dokezo la kidiplomasia kwa serikali ya India, ikilaani kitendo hicho na kuitaka serikali ya india ichukue hatua za kisheria na haraka katika kupeleleza kufuatia matukio hayo, na waziri wa mambo ya nchi za nje wa India, alitoa taarifa rasmi kule New Delhi,kwanza kuomba radhi kwa Tanzania na watanzania walioko India kwa kitendo hicho kilichotokea, akaagiza serikali yake ichukue hatua za kisheria na kupeleleza na kukamata wale waliohusika, na wote sasa wamekamatwa na wamepelekwa mahakamani”, alisema Waziri Mahiga.

Pamoja na Hayo Waziri Mahiga alisema serikali India iliagiza kwamba wanafunzi wa Tanzania wapewe ulinzi maalum kule wanakoishi na kusindikizwa pale wanapokwenda masomoni au madarasani , na tatu serikali ya India ilimtaka balozi wetu afuatane na maafisa waandammizi wa wizara ya mambo ya nchi za nje ya India mjini Bangalow, ili kukutana na wanafunzi wa Tanzania na wengine wa Afrika, na kuweka mahusiano mazuri kati ya wananfunzi na wenyeji katika mji huo.

Pia Waziri Mahiga alitoa taarifa rasmi juu ya kifo cha mwanafunzi mwingine Mtanzania nchini humo, na kusema mwanafunzi huyo hakufariki kwenye tukio hilo la uvamizi, bali alipata ajali ya pikipiki iliyosababisha kifo chake.

“Nilielezwa kwamba kuna mwanafunzi mmoja ambaye amefariki karibu na maeneo hayo hayo , taarifa za awali zilikuwa zinatatanisha wakadhani kifo hicho kilitokana na tukio hilo la kuvamiwa wanafunzi wetu, lakini si kweli, mwanafunzi huyo mtanzania alikuwa anaendesha piki piki bila kofia, akaenda kugonga nguzo ya taa na kufariki pale pale, ubalozi wetu unashughulikia mazishi na mwili wake utarudishwa Tanzania mapema iwezekanavyo.

Tukio hilo limeingia siku ya tatu sasa tangu kutokea kwake nchini India, ambapo kumeibuka hisia tofauti tofauti miongoni mwa watanzania, na kuwatia hofu wanafunzi wanaosoma nchini humo.

Kategori

Kategori