 |
| Balozi Ombeni Sefue. |
Katibu Mkuu Kiongozi na Mkuu wa Utumishi wa Umma, Balozi
Ombeni Sefue ambaye pia ni Katibu wa Baraza la Mawaziri, leo atazungumza na
waandishi wa habari Ikulu, Dar es Salaam.
Taarifa fupi iliyotolewa jana
na Ikulu, ikiwa haina ufafanuzi wowote, wala kutaja ajenda za mkutano huo,
ilisema Balozi Sefue atazungumza kuanzia saa 5 asubuhi.
Mkutano huo hata hivyo,
kulingana na muktadha wa kisiasa uliopo nchini, ndio unaotazamiwa na wengi
kutangaza uteuzi wa mawaziri wapya uliokuwa ukisubiriwa kufanywa na Rais Jakaya
Kikwete.
Uteuzi huo unatokana na
nafasi wazi 5 zilizopo katika Baraza la Mawaziri baada ya mawaziri watatu
nafasi zao kutenguliwa, mmoja kujiuzulu na mwingine kufariki dunia.
Aliyefariki dunia hivi
karibuni akiwa kwenye matibabu Afrika Kusini, ni aliyekuwa Waziri wa Fedha,
William Mgimwa huku aliyekuwa Waziri wa Maliasili na Utalii, Balozi Khamis
Kagasheki akijiuzulu nafasi yake.
Mawaziri waliotenguliwa
nyadhifa zao ni aliyekuwa wa Mambo ya Ndani ya Nchi, Dk Emmanuel Nchimbi, wa
Ulinzi na Jeshi la Kujenga Taifa, Shamsi Vuai Nahodha na wa Maendeleo ya Mifugo
na Uvuvi, Dk David Mathayo David.
Mawaziri hao wanne walikumbwa
na kadhia iliyotokana na Operesheni Tokomeza Ujangili , ambayo haikufanyika
vema na watendaji wao wa chini na kusababisha kashfa ya mauaji ya raia,
majeruhi, udhalilishaji kijinsia na mauaji ya mifugo.
Hayo yalijibainisha katika
Mkutano wa Bunge ambapo baadhi ya wabunge walilalamikia utekelezaji wa
operesheni hiyo hata kusababisha Kamati ya Maliasili, Ardhi na Mazingira, chini
ya Mbunge wa Kahama, James Lembeli kupewa jukumu la kufanya uchunguzi.
Baada ya uchunguzi
ikathibitishwa kuwapo kwa vitendo hivyo vilivyokiuka haki za binadamu na
hatimaye Waziri mmoja kujiuzulu na watatu kutenguliwa uteuzi wao, huku mmoja
akifariki dunia kwa ugonjwa na kusababisha nafasi hizo kuwa wazi.
Watu mbalimbali wakiwamo
wanasiasa, wanahabari na wachambuzi wa masuala ya kisiasa, walianza kubuni,
kuzusha na wengine kuvumisha kufanyika kwa mabadiliko makubwa katika Baraza la
Mawaziri huku wengine wakifikia hatua ya kubashiri majina.
Hatua hiyo ilifanya ofisi ya
Balozi Sefue kutoa tamko la kukanusha kuwapo uteuzi huo na kutaka wananchi
kuvuta subira, kumwachia Rais afanye kazi yake kuhusu nafasi hizo.
Kutokana na uvumi na uzushi
huo, ulifika wakati zikaibuka tuhuma za baadhi ya ‘wanaowania’ uwaziri ambao
hausomewi wala kugombewa, kujikuta katika mitego ya kurubuniwa na waliojifanya
wana usalama wa Taifa na kuwakamua fedha ili “wawapigie debe wateuliwe.”
Kwa kuwa nafasi za wazi
zilizopo ni tano tu haitarajiwi Rais kuvunja Baraza lake na kuja na jipya, ila
kinachotazamiwa ni kuziba mapengo yaliyopo na pengine kubadilisha nafasi.
Lakini haitashangaza kuona
baadhi ya waliotenguliwa nafasi zao wakirejeshwa kwenye uwaziri ingawa si
katika nafasi zilezile, kwa sababu kutenguliwa kwa nafasi zao hakukumaanisha
kwamba walishiriki moja kwa moja kukiuka haki za binadamu katika operesheni
hiyo.
Hata hivyo, hiyo haimzuii
Rais kuingiza sura mpya katika Baraza lake pale atakapoona inafaa na baada ya
kushauriana na wasaidizi wake wa karibu, ilimradi nia ni kuhakikisha maendeleo
ya Mtanzania yanapatikana.
Alipoulizwa kama upo
uwezekano wa mkutano huo kutangaza mawaziri wapya, Mkurugenzi wa Mawasiliano ya
Rais Ikulu, Salva Rweyemamu alikataa kujua undani wa mkutano huo, mbali ya
kusema yeye alitakiwa kualika waandishi na si zaidi ya hapo.
“Mimi niliombwa kufanya kazi
ya kualika tu na Katibu Mkuu Kiongozi mwenyewe alisema atazungumza na waandishi
na kama kuna maswali ataulizwa hapo hapo,” alisema Rweyemamu.
Na Matutukio na Vijana