Idara ya Afya katika Manispaa ya Songea imekamata vipodozi na vyakula vyenye sumu vyenye thamani ya zaidi ya shilingi milioni mbili. Akizungumza kwa niaba ya Mganga Mkuu wa Manispaa ya Songea, Afisa Habari wa Manispaa hiyo, Albano Midelo amesema kuwa vipodozi hivyo vimekamatwa katika kipindi cha kuanzia mwezi Aprili hadi Juni mwaka huu katika ukaguzi endelevu unaofanywa na idara hiyo.
Alitaja vipodozi vyenye sumu ambavyo vimekamatwa kuwa ni Actif Plus, Betasol, Broze, Cocoderm, Carolight, Carotene, Citrolight, Clairmen, Cocopulp, Corton, Diproson na Epiderm.
Aliyekuwa Waziri Mkuu wa Tanzania, Edward Lowassa ameruhusiwa kutoka katika Kituo Kikuu cha Polisi Dar es Salaam baada ya kuhojiwa na kisha kujidhamini.
Lowassa ambaye pia ni Mjumbe wa Kamati Kuu ya CHADEMA amehojiwa kuhusu tuhuma za uchochezi zinazomkabili na akaruhusiwa kuondoka ambapo ametakiwa kurejea tena siku ya Alhamisi.
Kwa mujibu wa Wakili Peter Kibatala, sababu za kuhojiwa kwa Lowassa ni juu ya kauli alizozitoa wakati wa futari alipokuwa akiongea na waumini wa dini ya kiislam.
Miongoni mwa mambo mengi aliyozungumza Lowassa katika futari hiyo ni kuhusu Masheikh wa Uamisho wanaoshikiliwa na serikali kwa miaka minne sasa dhidi ya tuhuma za ugaidi.
Lowassa alipewa wito huo jana, ambapo tangu alipofika katika kituo hicho cha polisi leo asubuhi, ulinzi umeimarishwa kufuatia wingi wa waandishi wa habari na watu wengine waliokuwa wamekusanyika jirani na kituo hicho.
Lile sakata la kuhusu usajili wa Paul Pogba kwenda United bado halijaisha na upelelezi wa kesi hiyo bado unaendelea ambapo maofisa wa FIFA wanachunguza kila pande.
Suala la Pogba lilionekana kubwa pale ilipobainika kwamba wakala wa Pogba bwana Mino Raiola alipata karibia 50% ya pesa za usjili wa Pogba suala ambalo liliibua maswali kutokana na kiasi hicho cha pesa.
Sasa msemaji wa chama cha soka duniani FIFA ambao ndio wanachunguza suala hilo ametoa ufafanuzi kuhusu uchunguzi huo na kuwatoa Manchester United katika uchunguzi huo.
“Tumefungua mashtaka kuhusu Juventus kuhusiana na suala hilo na pia tumegundua upande wa Manchester United haukuwa na tatizo lolote katika usajili huo” alisema msemaji huyo.
Inaaminika kwamba Juventus walifanga ujanja ujanja na kuvunja sheria wakati wakimuuza Paul Pogba kwenda Manchester United na sasa watakuwa na kesi ya kujibu.
MWENYEKITI wa Kambi rasmi ya Upinzani Bungeni, Freeman Mbowe na mbunge wa Kawe Halima Mdee, jana wamehojiwa mbele ya Kamati ya Kudumu ya Haki, Maadili na Madaraka ya Bunge, inayoongozwa na Mbunge wa Newala Vijijini, George Mkuchika (CCM).
Mbowe ambaye pia ni wmenyekiti wa Chadema na Mbunge wa Kawe, Mdee walitakiwa kufika mbele ya Kamati hiyo kutokana na maagizo ya Spika wa Bunge, Job Ndugai aliyotoa bungeni Jumatano, Aprili 5, mwaka huu, akiwataka waripoti kwenye kamati hiyo siku iliyofuata.
Mbowe ambaye alikuwapo bungeni siku hiyo na Mdee ambaye hakuwapo, wote wawili wametii wito wa Spika, Ndugai wa kusimama mbele ya Mwenyekiti Mkuchika kuhojiwa kama ilivyokuwa imeagizwa na Spika wa Bunge wakitakiwakujibu tuhuma zinazowakabili. Mbowe inadaiwa alitoa lugha za matusi mtandaoni na Mdee anadaiwa kutoa lugha za matusi kwa Spika bungeni.
Mwenyekiti wa Chadema alifikishwa mbele ya Kamati hiyo akituhumiwa kufanya kosa la kulitukana Bunge mtandaoni baada ya wabunge wawili wa chama hicho kushindwa uchaguzi wa Bunge la Afrika Mashariki (EALA).
Baada ya Ezekiel Wenje na Lawrance Macha waliokuwa wakiwania nafsi za ubunge wa EALA kupitia chama hicho kupata kura nyingi za hapana, Mbowe inadaiwa alianza kutukana bunge mitandaoni.
Habari za Mbowe kwamba alitukana mitandaoni ziliibuliwa na Mbunge wa Mwibara, Kange Lugola (CCM) ambaye aliomba mwongozo wa Spika kuhusu kiongozi huyo kutoa lugha za matusi mitandaoni akilitukana bunge sababu ya wabunge wake kukosa kura za kutosha kuchaguliwa kuingia EALA.
Spika Ndugai wakati akitoa mwongozo kuhusu jambo hilo, alimtaka Mwenyekiti Mbowe afike kwenye Kamati ya Haki, Maadili na Madaraka ya Bunge kujibu tuhuma hizo mara moja.
NAPE Nnauye, jana ameondolewa kwenye nafasi yake ya Waziri wa Habari, Utamaduni, Sanaa na Michezo, kufuatia mabadiliko madogo yaliyofanywa katika Baraza la Mawaziri na Rais John Pombe Magufuli.
Ingawa Rais wa Jamhuri ya Muungano wa Tanzania anayo mamlaka ya kufanya uteuzi wa nafasi yoyote wakati wowote kwa mujibu wa katiba, tukio la kuondolewa kwa Nape, limepokewa kwa mshtuko mkubwa na tasnia ya Habari nchini, hasa kwa kuwa alionekana dhahiri kuwa pamoja nao katika kipindi hiki ambacho wametikiswa.
Nape, mtoto wa kada wa zamani wa Chama Cha Mapinduzi (CCM) Brigadia Moses Nnauye, aliteuliwa katika Baraza la Mawaziri la Kwanza la Rais John Magufuli Desemba 9, 2015 kushika wadhifa huo. Hadi jana wakati akiondolewa ofisini, Nape anakuwa amehudumu katika uongozi huo kwa siku 467, huku akionekana kama mtu ambaye alitekeleza majukumu yake kwa namna ya kipekee, kwani kwa muda wote huo, aliweza kukutana, kujadili na kutoa maamuzi mazuri kwa watu wote waliohusika na wizara yake.
Ingawa wizara yake ilihusika na wanamichezo, wasanii, wana utamaduni na wanahabari, lakini ni watu wa kundi la mwisho ndilo waliopatwa na mshtuko mkubwa, hasa kwa kuangalia siku zake tano za mwisho akiwa kiongozi, jinsi alivyoshirikiana nao katika tukio kubwa na baya kuwahi kuitokea tasnia ya habari Tanzania.
Ijumaa ya Machi 17, 2017 usiku, chumba cha habari cha televisheni ya Clouds kilivamiwa na askari, wakiongozwa na Mkuu wa Mkoa wa Dar es Salaam, Paul Makonda ambaye alikwenda studio na kuwatisha watangazaji, kwa kitendo chao cha kushindwa kurusha habari iliyokosa vigezo, iliyomhusu Askofu wa Kanisa la Ufufuo na Uzima, Josephat Gwajima.
Tukio hilo lilibakia kuwa siri ya kituo hicho hadi video fupi ilipovuja, Jumapili Machi 19, 2017 na kuzua mjadala mkubwa mitaani na kwenye mitandao mbalimbali ya kijamii, kitu kilichomuibua Waziri Nape ambaye kupitia akaunti yake ya mtandao wa Twitter, alisema kama Waziri anayehusika na habari, angekwenda kesho yake, Jumatatu katika ofisi hizo ili kujua kilichotokea. Jumatatu ya Machi 20, 2017 Waziri Nape alikwenda Clouds kama alivyoahidi na huko akakutana na uongozi wa Clouds Media Group, chini ya Mkurugenzi wake Mtendaji, Joseph Kusaga na kufanya mazungumzo.
Pia alikuwepo Mwenyekiti Mtendaji wa kampuni za IPP, Reginald Mengi ambaye ni Mwenyekiti wa chombo cha wamiliki wa vyombo vya habari, MOAT. Akionekana mtu aliyesikitishwa na tukio hilo, Nape aliteua Kamati ya watu watano, ikiongozwa na Mkurugenzi wa Idara ya Habari (Maelezo) Dk.
Hassan Abbas ili kutafuta ukweli wa tukio hilo na kuwapa saa 24 ili wakamilishe ripoti yao. Jumanne, Machi 21 waandishi wa vyombo mbalimbali vya habari walikusanyika Makao Makuu ya Mamlaka ya Mawasiliano nchini (TCRA) barabara ya Sam Nujoma kusikia kilichosemwa na Kamati, lakini hakukuwa na chochote, kiasi kuzua minong’ono kuwa ‘wakubwa’ wamezuia ripoti hiyo, jambo ambalo lilikanushwa na Nape, aliyetaka kuwepo kwa subira, kwani kamati yake ilikuwa bado kazini.
Jumatano, Machi 22, 2017 katika Ukumbi wa Idara ya Habari (Maelezo) Waziri Nape alipokea ripoti ya kamati hiyo, ambayo kabla ya kukabidhiwa, ilisomwa hadharani na Katibu wake, Deodatus Balile. Akiipokea ripoti hiyo, Nape alisema imemsikitisha na akawataka viongozi kuwa na ngozi ngumu, hasa wanapoongoza watu.
Alisema yeye sio mtu wa kutoa uamuzi juu ya suala hilo, isipokuwa ripoti hiyo ataiwasilisha kwa mamlaka ya juu yake, ambao ni Waziri Mkuu, Makamu wa Rais na Rais wa Jamhuri ya Muungano wa Tanzania, ambao ndiyo wenye mamlaka ya maamuzi.
Jumatano, Machi 23, 2017 taarifa iliyosainiwa na Mkurugenzi wa Mawasiliano Ikulu, Gerson Msigwa ilisema Rais John Magufuli amefanya mabadiliko madogo katika Baraza la Mawaziri, kwa kumteua Dk. Harrison Mwakyembe kuwa mbadala wa Nape, huku nafasi yake yeye (Mwakyembe) ikichukuliwa na Profesa Paramagamba Kabudi. Maisha kweli hayatabiriki, anyway, Karibu Mheshimiwa Harrison Mwakyembe, uanzia pale alipoacha Nape Nnauye!
TAZAMA JAMAA HUYU ALIVYOKOSWA KOSWA NA KIFO KWA AJARI MTONI
Mwenyekiti Kamati ya Kudumu ya Bunge, Viwanda na Biashara, Dkt. Dalaly Peter Kafumu, makamu mwenyekiti wa Kamati hiyo, Vicky Kamata wamejiuzulu nyadhifa zao hizo leo Machi 20, 2017.
Wabunge hao wamesema wamefanya uamuzi huo ili waweze kupata muda wa kutosha kuwatumikia wananchi majimboni mwao.
Aidha viongozi hao wameeleza sababu za kuchukua hatua hiyo kuwa ni serikali kuingilia majukumu yao katika utendaji kazi na hivyo wakaeleza kuwa hawaoni sababu za kuendelea na majukumu hayo.
Kafumu ni Mbunge wa Jimbo la Igunga (CCM) ambapo Vicky Kamata ni Mbunge wa Viti Maalum (CCM) akiwakilisha wanawake wa Mkoa wa Geita.
Wamekabidhi barua za kujiuzulu kwenye ofisi ya spika wa bunge jana.
