WAKATI Filamu ya marehemu Kanumba inayokwenda kwa jina la Power & Love ikitarajiwa kuzinduliwa keshokutwa (Jumapili) katika viwanja vya Leaders Kinondoni, jijini Dar es Salaam, yapo maswali mengi yameshaanza kujitokeza kwa wadau mbalimbali na mashabiki wa msanii huyo katika siku hiyo.
Filamu
hiyo ambayo ndiyo ya mwisho kuicheza marehemu Kanumba na matukio yake
yanaelezwa kuonesha namna gani alivyoweza kujitabiria kifo chake, itakwenda
sambamba na kumbukumbu ya mwaka mmoja tangu alipofariki dunia, kwani alifarika
dunia tarehe na mwezi kama siku hiyo ya Jumapili.
Akizungumza
na waandishi wa habari hivi karibuni, mdogo wa marehemu Kanumba, ambaye pia ni
kiongozi wa ofisi yake ya ‘Kanumba The Great’ iliyopo Sinza, Seth Bosco,
alisema katika uzinduzi huo zaidi ya waigizaji 10 kutoka Ghana wanatarajiwa
kuwepo siku hiyo na hakutakuwapo na kiingilio.
Anasema
mbali na waigizaji hao wa Ghana, pia rafiki wa marehemu, ambaye ni muigizaji
maarufu barani Afrika, Mnigeria Ramsey Noah, pia anatarajiwa kuwapo.
“Ramsey
tulimpigia simu na tukamtaarifu na akasema kuhusu uwepo wake siku hiyo atatujulisha
kabla kama anakuja au la, kutokana na kuwa na majukumu mengi ya kikazi,”
anasema Bosco.
Akizungumzia
ratiba ya siku hiyo, alisema itaanzia nyumbani kwa marehemu, baada ya hapo
wataelekea makaburini na baadaye Leaders kwa ajili ya uzinduzi huo.
Kabla
ya kufanyika uzinduzi, Bosco anasema kutatanguliwa kwanza na ibada itakayoanza
saa nne asubuhi na kwisha saa tano katika kanisa la Kimara, ambapo mashabiki wa
filamu za Kanumba watatakiwa kufika asubuhi nyumbani kwa marehemu.
Anasema
mara baada ya ibada hiyo, ndugu, jamaa, marafiki, waigizaji pamoja na mashabiki
wake watakula chakula cha pamoja kisha kuelekea makaburini Kinondoni kabla ya
kuingia viwanja vya Leaders.
Hata
hivyo katika shughuli za uzinduzi bendi ya muziki wa dansi ya Twanga Pepeta
ndiyo itahusika siku hiyo kwa upande wa burudani itakayokwenda sambamba na
uuzwaji wa nakala za filamu hiyo papo hapo.
Katika
filamu hiyo wameshirikishwa wasanii mbalimbali akiwamo Irene Paul, marehemu
Sharo Milionea, Idrisa Kupa, Cathy Rupia na wengineo.
Marehemu
Kanumba alifikwa na mauti Aprili 7, mwaka jana nyumbani kwake Sinza Vatican,
huku kifo chake kikihusishwa na msanii wa filamu, Elizabeth Michael ‘Lulu’,
ambaye kwa sasa yupo nje kwa dhamana baada ya kukaa maabusu kwa takriban miezi
10.